Sunday, January 28, 2007,5:03 AM
الأولى أه
يا مساء الجمال ...
الأغنية اللي جاية دي ...قديمة !!! ومش أغنية بالمعنى المفهوم ..هو موال غناه عمنا محمد العزبي
بصراحة الموال عجبني جدا..وكلامه معبر جدا ومش محتاج كلام كتير يتقال عليه أسيبكو تعيشوا مع الموال والحاجات الشعبي الأصيلة
اسمع يا سيدي:

الأولى أه على القلب اللي متهناش
والتانية اه على اللي صابر بس بخته مجاش
والتالتة اه على اللي في الدنيا لا مات ولا عاش
حبينا يا قلبي لكن شوفنا حبايبنا سابوا اللي يسوى وراحوا للي ما يسواش
يااااااااااااااا ليل
لقيت طيرة بتتألم ونار حامية بتكويها
على عود الحطب واقفة وشوك الدنيا حواليها
وصياد القدر واقف وبرصاصه هيرميها
سألت عليها بدي أعرف لمين هي ومين ليها
قالولي الأم سيباها وأبوها كمان ناسيها
يا عيني
ضحية في الدنيا, يا خوفي الوحدة تضنيها
ده لو هب الهوا ليلة, مسير العود يميل بيها
وقولت يا رب ساعدني. علشان اقدر انجيها
شاورت بإيدي أناديلها, وجاتلي وخدت بإديها
بنيت العش في العالي , وكان قصدي أعليها
ولما عششت جنبي, وشوفت الفرح في عنيها
فتحت لحبها قلبي, وقلت يا رب هنيها
وخدت من الشجر ورقه , عجنته الحنة أحنيها
وخدت من العنب خمره , عشان أشرب وأسقيها
وخدت من العسل شهده , عشان تاكل وأغذيها
وخدت من الهوا غنوة بصوت الناي أغنيها
وجبت الورد من البلدي , عملته تاج يحليها
وجبت بخور من الجاوي , أبخرها وأرقيها
وجبت حرير من الهندي , عملته ستار يداريها
وليلة في العشا جالها واحد تاني يناديها
سابتني للي كان, وحدي , ونزلتله برجليها
حلوة مش كده....بجد تمام قوي
طبعا كالعادة عايز تسمع هتسمع طول مانت على البلوج وده موضوع مؤقت علشان هتتشال مع المواضيع الجديدة كنوع من الإحلال والتجديد..!!!
عايز تنزل الأغنية دوس على اللينك ده
 
posted by VLaD | Permalink |


13 Comments:


  • At 28/1/07 14:34, Blogger shaimaa

    طول عمرى اقول ان عيلتنا دى
    بتطلع ناس كده و اصوات كده

    اصل محمد العزبى .. خال بابا

     
  • At 28/1/07 15:21, Blogger saso

    الله الله
    بادخل صدفة لقيت الموال بس حلو اوي

    شفت طلع خال بابا شيماء
    يوووة هاستني لحد لما اروح علشان اداونلوودة
    بس بجد حلو
    The M ميرسي يا

     
  • At 28/1/07 18:59, Blogger The M

    شيماء
    بجد العزبي خال باباكي...بجد بحييكي ...انت من الأحرار

     
  • At 28/1/07 19:00, Blogger The M

    ساسو
    العفو يا جميلة
    واستني حاجات من دي كتير

     
  • At 29/1/07 14:35, Blogger shaimaa

    اه والله
    خال ابويا
    اخو جدتى الصغير

    وابوهم محمود العزبى
    عازف درامز معروف زمان

    يا بنتى احنا عيلة فنية جدا

     
  • At 29/1/07 14:36, Blogger shaimaa

    اسفة قصدى يا ابنى
    مش بنتى

    حول بعيد عنك

    واننى من الاحرار

     
  • At 29/1/07 15:34, Blogger The M

    شيماء
    ولا يهمك وحصل خير

     
  • At 31/1/07 20:41, Blogger bescuita

    عارفة انى اتاخرت
    كان مفروض اعدى و اعمل الواجب بس الدنيا تلاهى

    بس صراحة فوجئت
    حلوة اوى
    بجد يا إم

    كلام تركيبة
    ماتجيبهوش من اى صيدلية كده

    حلو حلو
    اهنيك على اختيارك

     
  • At 1/2/07 01:44, Blogger The M

    bescuita
    شكرا ليكي يا بنتي
    وعموما الواجب وصل من زمان
    بس ايه رأيك في التركيبة دي...حاجة أخر مزاج
    وكل عام وانتم بخير

     
  • At 2/2/07 06:17, Blogger Human

    جميل أوي الموال ده ...بجد اختيارك جميل أوي...أتمنى التواصل

     
  • At 2/2/07 21:49, Blogger The M

    human
    ربنا يكرمك يا بنتي...وانا أيضا اتمنى التواصل

     
  • At 3/2/07 00:23, Blogger Sharm

    محمد العزبي صوت جميل جدا

     
  • At 3/2/07 20:10, Blogger The M

    sharm
    محمد العزبي صوا جميل وده شيء لا جدال فيه
    شكرا لمرورك