Sunday, December 14, 2008,3:14 PM
يلا بينا ..يلا بينا

أواخر الستينات وبنوتة نزلت من عالم الأوبرا لعالم الغنا من غربي لشرقي علي ايد بليغ حمدي ، بصوت فيروزي قدمت استعراض وموشحات واغاني حب واغاني وطنية وفي نص المشوار كانت أغاني الأطفال بتتمتع باهتمام كبير اجتمعت عفاف مع سيد حجاب وعمار الشريعي ومحسن جابر في البومين للأطفال أولهم كان أطفال أطفال اللي فيه الغنوة اللي طلبها فركيكو .. وتانيها وهو الأشهر اللي في غنوة سوسة واتصور منه غنوتين واحدة علي مسرح- كانوا بيصروا يسموه اوبريت من غير سبب واضح- بتحضرة كالعادة السيدة الأولي والتانية مع سمير غانم في كليب معمول حلو اوي
غير الألبومين اللي فيهم 17 غنوة كان في حوالي 3 أغاني منفصلة في مناسبات مختلفة واوبريت عن الساعة بدور عليه من زمان! كلهم لنفس الملحن والمؤلف
يلا بينا كان ليها تصوير مميز جدا بكارتون كليب مميز للأسف مش موجود الكارتون دلوقت ، اللي موجود كارتون مصمم علي الغنوة وبصراحة مش حلو.
مزيكا الغنوة كانت مقدمة لبرنامج أطفال تقريبا كان اسمه دنيا الأطفال وده خلانا نرتبط بالغنوة اكتر واكتر، صوت عفاف في كل أغانيها حتي الشرقي والشعبي منها فيه سنه أوبرا ومقامات غربي علمتنا نحبها بدل ما نهرب منها


نسمع الغنوة
<< يلا بينا >>


 
posted by saso | Permalink | 9 comments
Wednesday, October 01, 2008,1:59 AM
احنا صحاب العيد

كل سنة واحنا طيبين
لقيت الفيديو ده لبنوتة كنت بموت فيها- يمكن عشان قصة شعرها- اسمها مي عبد النبي
مي كانت في اجمل حالاتها ف فوازير عبد المنعم مدبولي "جدو عبده " وفي اقلها ف مسرحية استاذ مزيكا
المهم انها كان شكلها طفلة جدا فكنا بنحبها جدا
الفترة دي كانت حمي المناسبات عالية جدا، كل مناسبة عشرين غنوة تطلع- ياااه علي 6 اكتوبر ايامها-بعد فترة اتبقت اهلا بالعيد وباقي الحاجات ضاعت ف الزحمة

بيشاركها الغنا طلعت عطية" مطرب الأطفال" زي ماكان بيحب يسمي نفسه، كانه مش موجود بالظبط اتفرجوا علي مي لوحدها
:)

تعالوا نشوف الفيديو



-
 
posted by saso | Permalink | 6 comments
Saturday, August 16, 2008,3:05 AM
الحب هو

كان من أحلي تهييسات التسعينات ظهور حلقات الربع ساعة اللي يا إما برامج مقالب وكاميرات خفية أو حلقات كوميدية أقرب للسيتكوم بس من غير جمهور زي "تليفزيون في بيتي "و"انت عامل ايه" بس كان أطرفهم حلقات الحب هو بين أحمد رجب ومصطفي حسين
بنفس صورتها في الجورنال تقريبا ريشة مصطفي حسين بتجري علي خلفية موسيقي وتعليق لاحمد رجب وينزل التيتر

الأغنية في التيتر كانت بتشدني أوي وقتها، كانت موضه البنات اللي صوتهم رفيع شويتين علي ألحان راقصة مشابهه لمزيكا حميد منتشرة جدا
ومنهم كانت أغاني "ماجدة" اللي تقريبا محدش أخد باله منها غير في الغنوة دي عشان حلقات الكاريكاتير


<<الحب هوا>>





 
posted by saso | Permalink | 7 comments
Wednesday, July 09, 2008,9:06 PM
عم بطاطا

جتلنا هدية
ومش أي هدية يا شيماء ده "علي"

الغنوة من ألبوم "لم الشمل سنة 91" الألبوم كله كان حاجة خاصة كده، ممكن نسميه ألبوم وطني بس مش أغاني وطنية من بتاعة تحية العلم
الأغاني فيها حب ولوم ،اشتياق وغيظ من الوطن

اااه يا شيماء
بيقولك ايه
متغربيناش ف الارض البور واحنا الزراع

وايدينا سواقي فرح بتدور رغم الأوجاع



طبعا
شيماء اختارت احلي الأغاني .. عم بطاطا وكتبتلنا الكلمات

<<عم بطاطا .. على الحجار>>

عم بطاطا لذيذ و معسل
عمره ماطاطا لغير الله
لما الدنيا تقسي
يمثل
انه خلاص سلم لقضاه
قال ايه سلم لقضاه

عم بطاطا .. يقول الراوي
خبى الحكمة فى توب الحاوي
ينفخ ناره عشان افطاره
وبنكتته بيداوى بلاوى
آآآآآآآآآآآآآآآآآه بيداوى بلاوى

عم بطاطا لذيذ و معسل
عمره ماطاطا لغير الله
لما الدنيا تقسى
يمثل
انه خلاص سلم لقضاه
قال ايه سلم لقضاه

عم بطاطا بيمشى فى حاله
علشان رزقه ورزق عياله
غصبن عنه يقف يتكتف
بس بكيفه يفك حباله
آآآآآآآآآآآآآآآآآآآآه
يفك حباله

عم بطاطا لذيذ و معسل
عمره ماطاطا لغير الله
لما الدنيا تقسى
يمثل
انه خلاص سلم لقضاه
قال ايه سلم لقضاه

عم بطاطا يزك الزكة
يعبر سينا ويفتح عكه
وبيصبر على الجار السو
خمسين سنة ويقول دول فكه

عم بطاطا يزك الزكة
يعبر سينا ويفتح عكه


--------
علي جنب كده لشيماء
سميه هامش :)

غير اني بحبك يعني .. ليكي عندي جميل انتي متعرفيهوش

 
posted by saso | Permalink | 11 comments
Sunday, May 04, 2008,11:56 AM
Take me back 2 Cairo

nostalgia
الإنكشاري من غير ما يقصد فتح الباب لحكي كتير بس احنا مبنتكلمش هنا بنسيب الميديا تقول بدالنا كل الكلام
نوستاليجا الطفولة زي ما قال هوا وقال محمد ابو زيد مره في تعريف للمدونة
ااااه
طيب يلا نكمل بالحنين للقاهرة

"
Take me back to Cairo
"
الوطن المختصر.. كتير بحس ان خروجي بره القاهرة غربه
من فترة معلقة معايا نغمة من غنوة قديمة لجيل التمانينات هيفتكروها من سمير الاسكندراني لما كانت بتيجي كل يوم جمعة
:)
مغنيها الأصلي"كريم شكري" مصري هاجر لكندا في الستينات وابتدي يغني ووصلت اغانيه لمصر ولسه هناك بس بينتج ويوزع افلام

بعد كريم غناها "سمير الاسكندراني" بعدها جمعت شركة صوت القاهرة في البوم واحد اشهر اغاني الفرانكو لكريم شكري ولبرونو موري في البوم في أواخر السبعينات

برونو كان له مجموعة من اشهر اغاني الأنجلو والفرانكو اراب لو فاكرين فطومة ويا مصطفي و علي بابا دول الثلاثية بتاعة محمد فوزي
مش فاكرة جبت الالبوم بالظبط امتي
بس العودة للقاهرة فضلت ترن ف عقلي سنين، هتفضل هيا احلاهم عندي، وبصوت كريم مش سمير الاسكندراني
حاجة تاني مهمة عن الغنوة
توزيعها رائع ، الأغنية كانت الوحيدة في الالبوم اللي من توزيع " أندريا رايدر" و اندريا موزع مهم جدا تقريبا كل أغاني محمد عبد الوهاب كانت بتوزيعه
بلعب علي يوتيوب لقيت الفيدو ده، مهواش الفيديو الأصلي ده شكله جديد بس معمول كويس وفي لقطات من الاغنية الاصلية

قبل الفيديو ده لينك تاني للغنوة بصوت سمير الاسكندراني واللينك اللي فوق بصوت كريم شكري وده نفس اللي بيشتغل علي المدونة دلوقت “Take me back to Cairo”


 
posted by saso | Permalink | 14 comments
Saturday, February 16, 2008,12:06 AM
كوكو واوا
بلف لفه وارجعلها

الغنوة الأصلية كانت بتيجي كل يوم تقريبا فمكانتش بتوحشني


في التمانينات- كالعاده- فرقة امريكانا شو وعاليا تحديدا عملت الغنوة بطريقة جميلة جدا جدا، اللي هيا شغالة علي المدونة دلوقت
بس جه علي بالي بقي أحلي مرة سمعت فيها الغنوة زمااااان


مسلسل كابتن جوده لسمير غانم، لما كان بيحاول يعلم الولاد علي أنغام كوكو-واوا بالصعيدي


مينفعش نتكلم اكتر من كده -كويس ان عندي مدونة تانية ارغي فيها- نشوف الفيديوهين ونسمع عاليا
--

--


أنهي الأحلي :)

 
posted by saso | Permalink | 13 comments
Wednesday, August 15, 2007,3:17 AM
أشكي لمين
أشكي لمين .. احكي لمين
دنيا بتلعب بينا
تهنا سنين .. ولا عارفين
بكره جايب ايه لينا
بينا للفرح بينا
قبل الجراح ماتدق بابنا
جينا للدنيا جينا
بكره الزمان يسرق شبابنا

غنوة حبيتها اوي اوي من منير في فيلم احلي الاوقات بس غير (بكره الزمان يسرق شبابنا ) ل (اللي يصيبنا اهو من نصيبنا ) اكتر من لما غناها منيب وبعدين من أنغام في البومها الاخير بس المرة دي بقي بصوت ... محمد الحلو.. الفيديو نفسه قديم جدا وغريب، من غير كلام كتير تعالوا نشوفة



 
posted by saso | Permalink | 40 comments